Azkoitiko adinekoen San Jose egoitza herrigunera gerturatzea eskatzeko sinadurak biltzen jarraitzen du Egoitza Kalera taldeak. Otsailaren 22an ekin zioten sinadura bilketari eta harrezkero astelehenetan eta zapatuetan jarri dituzte mahaiak kalean. Gaurtik aurrera, ordea, ostegunetan eta zapatuetan jarriko dute mahaia Egoitza Kalerakoek. 19:00etatik 20:00etara egongo dira kalean ostegunetan, eta zapatuetan 11:00etatik 13:00etara; ateri bada, eliz atarian egongo dira, eta euria egiten duenetan, berriz, Kontzejupean.
Orain arte, San Jose egoitza dagoen tokitik herrigunera hurbiltzearen aldeko 1.650 sinadura jaso dituzte.