Azkoitiko Anaitasuna Mendi Bazkunak lau egunetako egitaraua antolatu du. Antolatzaileek Imanol Aleson omenduko dute azken egunean, lagunartean.
Anaitasuna Mendi Bazkunak Mendi Astea antolatu du datorren asterako, asteartetik hasi eta ostiralera bitartean. Beraz, mendizaletasunari eskainitako astea izango da datorrena. Hain justu, mendiari "merezi duen tokia" emateko helburuarekin sortu dute egitaraua antolatzaileek. Hala azaldu du Manu Larrañaga Anaitasuna Mendi Bazkunako kideak eta antolatzaileak.
Lehenengo egunerako, kirola eta osasuna ardatz hartuko dituen hitzaldia antolatu dute. Azken hamarkadan mendi lasterketek izan duten gorakada aztertuko dute hitzaldian, eta prestaketa egokia izateko pautak azalduko dituzte. Izan ere, "ez da ohikoena" Imanol Aleson bezalako punta-puntako kirolaria izatea, mendi bazkunako kidearen ustez. Alberto Garaik eta Jokin Lizeagak emango dute hitzaldia eta Ekaitz Artetxe arituko da moderatzaile lanetan.
Imanol Aleson Ehunmiliak irabazita, alabarekin. (Eskeine Legorburu)
Asteazkenean mendiko eskiari buruzko film bat botako dute Baztartxon. Saint Elias mendian kokatzen da dokumentala, Ameriketako Estatu Batuetako eta Kanadako bigarren mendirik altuenean. Axel Naglich, Peter Ressmann eta Jon Jonhston eskiatzaile ospetsuen istorioa da.
Tenperaturan hotzetik berora salto eginda, Saharan lehiatzen den Titan Desert probari eskainitako dokumentala ikusteko aukera izango da.
Ostiralean, azken egunean, Ultra-Trail proba ikaragarriaz hitz egingo dute mahai inguruan eta Imanol Aleson omenduko dute, izan ere azkoitiarrak azken edizioan parte hartu du. Behin hitzaldia bukatutakoan afari omenaldia egingo dute Joseba jatetxean. Etxeza harategian eman daiteke izena edo Anaitasuna Mendi Bazkunaren kontu korrontean 30 euroko ordainketa eginda.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide