Azaroak 30, larunbata. San Andres Eguna
- Egun osoan zehar. Herriko plazako arkupeetan txosnak jarriko dituzte herriko hainbat taldek: taloak, txistorra...
- 09:00. Izarre-Jandalon, Orion elkarteak antolatuta Plater Tiraketa.
- 10:00. Txuri Urdin elkarteak antolaturik, Marrazki eta Buztin Modela lehiaketa.
- 11:00. Herriko Trikitilari eta Dultzaineroen kalejira.
- 12:00. Udaletxeko Areto Nagusian, Kale Nagusia: Merkataritza biziari leihoa lehiaketako sari banaketa.
- 12:30. Herriko plazan, Herri Kirol Jaialdia. Txingak, lokotx bilketa eta trontza: Santa Sousa, txingan Euskadiko txapelduna; Nerea, trontzan Euskadiko txapelduna; Ainhoa, trontzan Bizkaiko txapelduna; eta Irati, trontzan Bizkaiko txapelduna. Harrijasotzaileak: Goenatxo II.a eta Izeta II.a, bakoitza 3 harrirekin. Aizkolariak: Mugerza II.a – Larretxea eta Zaldua – Arrozpide. 12 kanaerdiko eta 20 buelta korrika plazari.
- 16:30. Herriko plazan, Marrazki eta Buztin Modela lehiaketako sari banaketa.
- 17:00. Kontzejupean, Azkoitiko Pilota Eskola elkarteak antolatuta, Kontzejupe Sariaren azken partidak.
- 22:00. Gurea Udal Probalekuan, San Andres Idi Dema Saria. Kintopekoak: Epiola (Oikia), Urrutikoetxea Anaiak (Urduliz) eta Olatzar (Lezo).
- 22:30. Herriko plazan, Gozategi taldearekin dantzaldia.
Abenduak 1, igandea
- 10:00. Kultur Etxean, XVIII. San Andres Xake Torneoa.
- 12:00. Baztartxo Antzokian Gero Axular Dantza Taldearen euskal musika eta dantza saioa.
Abenduak 2, astelehena
- 22:00. Gurea probalekuan, San Andres Idi Dema Saria: Sistiaga (Urduliz), Igeldo (Ezkio)eta Bizkarre (Usurbil).
Abenduak 3, asteartea
- 22:00. Gurea Udal Probalekuan, San Andres Idi Dema Saria. Kintopekoak: Areta (Eibar), Lopategi (Billela) eta Roberto (Berriatua).
Plazan postuak jarriko dituzte goizetik gauera bitartean (Ane Olaizola/Hitza)
Udalak ohiko egitaraua prestatu du sanandresetarako; urtero bezala, sei txosna jarriko dituzte plazaren inguruan, eta jan-edana izango da nagusi egun osoan zehar, musika eta herri-kirol artean. Izan ere, kirola izaten da San Andres Eguneko beste protagonistetako bat, eta aurtengoan ez dute hutsik egingo. Iazkoari jarraituz, herri-kiroletan neska-mutilek eskainiko dituzte erakustaldiak. Aurten txingek, lokotx bilketak, trontzak, harri-jasotzeak eta aizkorak hartuko dute plaza. Arratsaldean, berriz, Kontzejupe Sariko pilota finalak jokatuko dituzte. Eskuz binakako sei partida eskainiko dituzte neska-mutilek, 17:00etan hasita. Azken bi saioak jubenil eta senior mailakoak izango dira. Eskuz banaka jokatuko dituzte horiek norgehiagokak.
Umeentzako ere egun handia izan ohi da biharkoa, eta horientzako ere ekitaldi ugari izango da: Marrazki eta Buztin Modelatze Lehiaketa prestatu du beste urte batez Txuri Urdin Elkarteak, eta beraz goizean zehar herriko txokoekin eta jaiekin lotutako kontuekin euren artelantxoak egingo dituzte. Materiala 10:00etatik aurrera jasoko dute umeek Txuri Urdinek Jausoro auzoan duen egoitzan, eta eguerdian berdura plazan utzi beharko dituzte lanak. 16:30ean izango da sari banaketa, eta horien lanak Etxebeltzen jarriko dituzte ikusgai astelehenera artean. Gainera, umeentzako gozagarri diren animaliak jarriko dituzte erakusgai plazan.
Erakusleihoak, prest
Biharkoan herritarrek hartuko dituzte kale nagusiko txokoak, eta hango hainbat lokal hutsetako erakusleihoak eraberrituta ikusteko aukera ere izango dute. Izan ere,
Kale Nagusia: Merkataritza biziari leihoa lehiaketaren irabazle Ana Bastidak dagoeneko gauzatu du proiektua, eta bihar jasoko du saria, udaletxean.
Aurten San Andres Eguna larunbata egokitu denez, gauera arte luzatuko da festa, eta horregatik musika kontzertua ere prestatu dute; Gozategi Orioko musika taldeak girotuko du herriko plaza.
Dantza saioa, igandean
Igandean ere izango da ospakizunik. Duela hiru urte bezala, Gero Axular dantza talde donostiarrak Argizaiola emanaldia aurkeztuko du Baztartxon; XIX. eta XX. mendeetan, gerra eta istilu zibilak tartean kokatutako ikuskizuna da.
Horrez gain, San Andres Idi Dema Saria jokatuko dute larunbatean, astelehenean eta asteartean. Honakoak izango dira kintopekotan lehiatuko direnak, Gurea udal probalekuan: Epiola (Oikia, Zumaia), Urrutikoetxea Anaiak (Urduliz), Olatzar (Lezo), Bizkarre (Usurbil), Sistiaga (Urduliz), Igeldo (Ezkio), Areta (Eibar), Lopategi (Billela, Mungia) eta Roberto (Berriatua).
1azkoitia.hitza.eus
