San Jose egoitzan Adinduen Astea ospatuko dute gaurtik

Artxiboko irudian, aurreko urte bateko San Jose egoitzako Adinduen Astea (Irene Elorza/Hitza) Herritar guztiak gonbidatu dituzte parte hartzera. Gaur arratsaldean hasiko da Adinduen Astea, txokolatadarekin. Ohi bezala, ikastetxeetako ikasleen bisitak ere jasoko dituzte, eta gaur Xabier Munibe ikastolaren txanda izango da; bihar XXVII. Seiko Urre Txapelketa jokatuko dute, 16:30ean, eta etzi Floreaga ikastetxekoek eskainiko die ikuskizuna. Ostiralean berriro txokolate beroa hartzeko aukera izango dute, 16:00etan, eta ordu erdi geroago bingo saioa izango dute. Asteburuan ere ekintza ugari izango dituzte San Jose egoitzan, eta larunbatean, 16:30ean, Bizkargi Musika eta Dantza eskolako ikasleen saioa izango da; 19:30ean, Duo Plaentxiren saioa eta afaria izango da. Igandean amaituko da Adinduen Astea, Sendiaren Egunarekin. Senideekin batera igaroko dute eguna, eta 10:00etan Txalkor txistulari taldearen emanaldia izango da. Ondoren meza izango dute, eta hamaiketakoa eta opari banaketa izango dute segidan. Bazkaria egingo dute guztiek gero.