Joan den ostiral iluntzean aspaldian ez bezalako betekada hartu zuen Aizarnazabalgo Adiskide gaztetxeak. Mus txapelketa antolatu zuten, eta izandako erantzunarekin ezin gusturago gelditu ziren gaztetxeko kideak. 28 bikotek parte hartu zuten, eta herrikoak eta inguruko herrietatik joandakoak ez ezik, espero zutena baino urrutiagotik bertaratutakoak ere izan zirela adierazi dute antolatzaileek. Esaterako, garaipena Bizkaira joan zen.
Hain zuzen ere, Julen Meabek eta Iñaki Lejardik osatutako bikoteak irabazi zuen txapelketa, eta 280 euroko diru saria eskuratu zuten. Bigarren lekuan, Zumaiako Axentxiok eta Rukak osatutako bikotea gelditu zen; hirugarren Gari eta Oihan aizarnazabaldarrak gelditu ziren; eta laugarren, Unax eta Aritz zumaiarrak.
Ostiraleko mus txapelketak izan zuen arrakasta ikusita, datorren urtean ere antolatzeko asmoa adierazi dute Adiskide gaztetxeko kideek.
