Urtea amaitzeko klasikoa bihurtu den San Silbestre lasterketa jokatu dute gaur eguerdian Aizarnazabalen ere. Ohi bezala, haurrek eta helduek elkarrekin egin dute proba, eta umorea izan da nagusi herrian. Hain zuzen, 12:00etan, elizako kanpaiak jotzearekin batera, abiatu dira lasterkariak udaletxearen aurretik, eta bi itzuli egin dizkiote zirkuituari. Txapelak edo betaurreko bereziak soinean, hainbat herritar animatu dira korrika egitera.
Aurtengoa ere lasterketa herrikoia izan da, lehiakortasuna alde batera utzita. Ez da irabazlerik egon, eta guztiek izan dute amaieran pintxoa jateko aukera, Uztarri tabernan.