X. Sagardo Txapelketa antolatu dute zapaturako Aizarnazabalen. Aurtengo edizioan, hamairu sagardotegi ariko dira txapela lortzeko lehian: Aburuza, Akarregi, Alorrenea, Altzueta, Añota, Bereziartua, Egi Luze, Ekain, Eula, Gaztañaga, Izeta, Petritegi eta Urdaira. Sagardotegi berdinek parte hartu zuten iazko txapelketan, eta Altzuetak irabazi zuen.
18:00etan hasiko da sagardoaren bueltako festa eta, epaimahaiko kideek ez ezik, herritarrek ere izango dute parte hartzaileen sagardoa dastatzeko aukera. Gainera, edatekoarekin batera, askotariko pintxoak dastatu ahal izango dituzte. Festa giroa borobiltzeko, gainera, musika egongo da arratsaldean zehar.