Herriko plazako frontoiko kantxan nahiz harmailetan giro herrikoia nagusitu zen atzo arratsaldean. Aizarnazabalgo pala txapelketa mistoko finalaurreko bi partidak eta finala jokatu zituzten 12 tantora, maiatzean hasi zuten lehiari azken hatsa emanda.
19:00etan hasi zuten lehenengo finalaurreko partida. Larraitz eta Dabid Etxabek Ainara Sagarna eta Eñaut Larrarte Teo izan zituzten aurkari, eta uste baino lehenago amaitu zuten partida, Larrartek mina hartu baitzuen. Markagailua 6-3an gelditu zuten, etxabetarren alde.
Bigarren finalaurrekoan, berriz, Iñaki Peñagarikano Artzain-ek eta Ainhoa Etxabek osatutako bikoteak Manex Arruti Txato eta Janire Garate hartu zituen mendean, 12-6ko emaitzarekin.
Finalerako sailkatu ziren, beraz, Etxabe anai-arrebak nahiz Iñaki Peñagarikano eta Ainhoa Etxabe. Larraitz eta Dabid Etxabek indartsu hasi zuten norgehiagoka, aurkariei puntu saldo nabarmeneko aldea aterata, baina behetik gora egin zuen beste bikoteak, eta 11 puntura berdintzea lortu zuen. Garaipenaren tantoa, azkenean, Iñaki Peñagarikanok eta Ainhoa Etxabek egin zuten.