Aizarnazabalgo ohiko medikuaren baja ordezkatu ez dutela eta, herritarrak aspalditik daude medikurik gabe kontsultategian, eta artatuak izateko beste herrietara joan behar dute. Hori dela eta, udalak martxan jarri du sinadura bilketa, Osakidetzak mediku bat herriko kontsultategira bidal dezan eskatzeko.
08:00etatik 11:00etara bitartean eskaintzen zen zerbitzua herrian; egun, astean behin bakarrik joaten da medikua bertara eta berriz ere aurreko ordutegira itzultzeko eskatu nahi dute sinadurekin. Udalak azaldu duen moduan "ezinbestekoa" da zerbitzua herritarrentzat, "udalerrian bizi diren eta Getariako kontsultategira joan ezin duten adinekoen eta gaixoen kopurua handia baita".
Eskaera Aizarnazabalgo Udaletxean, Mauxe janari dendan eta Erauskin Altuna farmazian sinatu daiteke, azaroaren 24ra bitarte.