Gure Plaza Txo! haur eta nerabeentzako aisialdi egitasmoa bigarren ikasturtea abiatzear da Aizarnazabalen, eta lehendabizikoak utzitakoak baloratzeko zein ikasturte berriak ekarriko dituenak aurkezteko bilerak antolatu dituzte aste honetarako.
Bi bilera deitu dituzte, biak datorren ostegunerako, azaroaren 2rako. Lehendabizikoa, gurasoei zuzendutakoa, 18:30ean hasiko da; eta bigarrena, aisialdi programaren erabiltzaileei, nerabeei, zuzendutakoa, 19:00etan. Bi batzarrak Lauburu eraikineko proiekzio gelan egingo dituzte.
Elkarlana
Gipuzkoako Foru Aldundiak mila biztanle baino gutxiago dituzten lurraldeko bederatzi udalerritan 12 eta 17 urte bitarteko haurren eta nerabeen "sustapena indartzeko" martxan jarritako proiektu pilotua da Gure Plaza Txo!.
Bederatzi udalerri horietako bat da Aizarnazabal –Albiztur, Alkiza, Altzo, Berrobi, Bidania-Goiatz, Elduain, Ikaztegieta, Larraul eta Lizartza dira beste zortziak–, eta egitasmoa garatzen ari diren gainerako herrietan bezala, Aizarnazabalen ere aldundiak eta udalak elkarlanean eskaintzen dute nerabeentzako aisialdi programa egitasmo horren barruan.
Iazko urrian jarri zuten martxan Gure Plaza Txo! Aizarnazabalen, eta beraz, bigarren ikasturtea izango du honako hau.