Ostiralean, ekainaren 16an, 20:30ean, jokatuko dute Gipuzkoako Herri Txikietako Areto Futboleko final erabakigarria Aizarnazabalek eta Ikaztegietako Kutturru taldeak, Aizarnazabalgo Atari Soro pilotalekuan.
Joaneko partida jokatuta, itzulerakoa izango da ostiralekoa. Joaneko partidan Kutturruk hartu zuen abantaila, etxean jokatutako norgehiagoka 5-3 amaituta. Bi taldeek maila berdintsua erakutsi zuten neurketan, beraz, edozein taldek eskuratu dezake garaipena ostiralean. Partida berdinketan amaitzen bada, bost minutuko luzapena izango du, eta denbora hori igarota ere berdinketa mantentzen bada, penaltien bitartez erabakiko litzateke neurketa.
Kirolaren aitzakian, festa giroa nagusituko da Aizarnazabalen arratsaldean hasita. 16:30ean emakumeen pala txapelketako finalerdiak jokatuko dituzte pilotaleku zaharrean. Ondoren, Atari Soro frontoian, Olber DJa izango da arratsaldea musikaz girotzen, eta jan-edanerako tarterik ere ez da faltako, bertan taberna jarriko baitute.