(Argazkiak: Urtzi Oteiza)
Astebeteren buruan bi agur eta omenaldi jendetsu jaso ditu eskualdean Oinatz Bengoetxeak. Pilota profesionala utzi ondoren herriz herri egiten ari den agurreko biraren barruan, Azkoitiko Kontzejupean izan zen atzo zortzi Bengoetxea VI.a; eta atzo, Samiel festen hirugarren egunean, Atari Soro pilotalekua gainezka zela, Aizarnazabalen.
Herriko festak ospatzen ari dira Aizarnazabalen, eta festa giroko agurra prestatu zioten Bengoetxeari aizarnazabaldarrek. Bi pilota partidaren bueltan egindako festa izan zen, Azteca taldeko mariatxiekin, Angel Peñagarikanoren bertsoekin eta Joxe Ramon txiste kontalariaren ateraldiekin. Bigarren partida jokatu zuen eguneko protagonista nagusiak, Mikel Goñi pilotari ohiarekin bikotea osatuz, Larrañagaren eta Azkoitian bikotekide izan zuen Erasunen kontra. Eta Kontzejupean bezala, atzo ere galdu egin zuen Bengoetxeak (22-12), baina inor gutxi zegoen emaitzarekin kezkatuta.
Partida amaitu ondoren, omenaldi ekitaldia egin zuten. Hainbat opari jaso zituen Leitzakoak, Mari Karmen Arregi alkatearen eskutik hartu zuen euskal makila tartean, eta ikusleen txaloak eta berotasuna ere ez zitzaizkion falta izan.