Aizarnazabalgo Udalak herriko gimnasioan bete beharreko segurtasun eta garbitasun neurriak gogorarazi ditu, eta gimnasioaren erabiltzaile guztiek horiek betetzea "ezinbestekoa" dela nabarmendu du.
Lau neurri edo betebehar zehaztu ditu udalak. Lehenik eta behin, azpimarratu du "derrigorrezkoa" dela gimnasioan musukoa erabiltzea. Horrekin batera, erakundeak gogoratu du gimnasioaren gehienez sei pertsonak erabil dezaketela aldi berean instalazioa, aparatuak erabili ondoren garbitu egin behar direla eta dutxak erabil daitezkeela, baina "beti ere, banaka".
Yoga eskolak hasteko aukera
Bestetik, hil honetan hasita yoga klaseak hartzeko aukera izango da Aizarnazabalen. Horretarako, ordea, gutxieneko taldea osatu beharko da. Yoga eskolak astelehenetan eta asteazkenetan ematea da asmoa, 18:30etik 20:00etara, Lauburuko laugarren solairuan.
Interesa dutenek liburutegian eman behar dute izena.