Izarkom Euskal Herriko telekomunikazio operadore kooperatiboaren inguruko hitzaldia eskainiko dute ostegunean, hilak 24, Aizarnazabalgo Adiskide gaztetxean, 18:30ean hasita. Solasaldian zehar operadore kooperatiboaren sustatzaileek proiektuaren sorreraz geroztik egindako ibilbidea azalduko dute, eta telekomunikazio burujabetza izango dute hizpide.
Euskal Herrian "azpiegitura telematiko zein telekomunikazio zerbitzuen gaineko burujabetzarantz" bidea egiten joateko sortu zuten Izarkom. Irabazi asmorik gabeko kooperatiba elkarte moduan eratu zuten operadorea, horretarako "beharra" zegoela iritzita: "Gaur egungo eredu ekonomiko kapitalista gainditzeko ekonomia sozial eraldatzailean oinarritutako alternatiba errealak plazaratzeko beharraz jabetuta gaude. Horregatik, irabazi asmorik gabe eta herritarren elkarlaguntzan oinarrituta egiten dugu lan".