Ostegunetik sanpedroetan murgilduta daude Aiako Andatza auzoan. Bihar izango da festetako egun handia, San Pedro eguna, baina gaurkoan ere izan dituzte ekitaldiak jaiez gozatzeko.
Goiz partean sardina jana egin dute auzoan, 11:00etan, eta jarraian, pilota txapelketan aritu dira auzotarrak. Arratsalde partean, poteo musikatua izango dute, eta elkarrekin afalduko dute gero, Euskal Parrillaren eskutik. Indate DJaren emanaldiarekin borobilduko dute eguna.
Bihar, berriz, ekitaldi ugari izango da goizean goizetik. Hona hemen egitaraua:
Ekainak 29, igandea: San Pedro Eguna
- 10:30. Meza nagusia.
- Jarraian, jubilatuen hamaiketakoa.
- 12:30. Herri Kirolak. Udane Ostolaza eta Ainitze Zumeta harri jasotzaileen eta bertako gazteen eskutik.
- 14:30. Jubilatuen bazkaria.
- 17:30. Emakumeen Gipuzkoako Txinga Eroate Txapelketako finala eta Gizonezkoen Gipuzkoako 2. mailako Aizkolari Txapelketako finala.
- Jarraian, sagardo dastaketa Laja eta Lutxurdio trikitilariek girotuta.
- 22:00. Erromeria, Laja eta Lutxurdio trikitilarien eskutik.
- 00:00. Traka Zaratatsua jaiei amaiera emateko.