2016. urteko maiatzean jakinarazi zuten "galdutzat" ziren Juan Sebastian Elkanoren zortzi gutun aurkitu zituztela Aian, Laurgain dorrean. Eusko Jaurlaritzako orduko lehendakariak eman zuen berria, Iñigo Urkulluk, Getariako Balentziaga museoan izandako ekitaldi batean. Bada, orain, bederatzi urte geroago, Gipuzkoako Foru Aldundiak jakinarazi du Laurgain dorrearen artxibo historikoa eskuratu duela, "Gipuzkoako historia ezagutzeko garrantzi handiko artxibo-funts pribatua".
Atzo argitaratutako prentsa oharrean, aldundiak esan du artxibo horrek, alde batetik, "Gipuzkoako historian funtsezkoak izan diren leinuek sortutako dokumentuak" jasotzen dituela, eta, bestetik, Juan Sebastian Elkanoren artxibo partikularretik gaur egunera arte iritsitako 9 dokumentu bakarrak biltzen dituela. Aurkitutako dokumentuen artean dago Elkanok 1522ko irailaren 6an munduari bira eman ostean Sanlucar de Barradematik (Andaluzia, Espainia) Carlos V. erregeari idatzi zion gutuna, bere bidaiaren berri emanez.
"Eskuratze horrekin, foru erakundeak ziurtatzen du ondare hori Gipuzkoan egongo dela", gaineratu du aldundiak.