Aiako Iturrarango Lorategi Botanikoan etengabekoa izan da jendearen joan-etorria asteburuan. Ehunka landarezalek gozatu dute 13. Landare Berezien azokaz, mundu osoko landareak aurkitu baitituzte lorategian zein parketxean atondu dituzten 47 mintegietan: etxe barrukoak, kanpokoak, sendagarriak, jangarriak, apaingarriak, karniboroak, zuhaixkak… Postuez gain, jan-edanerako txokoak ere egokitu dituzte Iturraranen, eta azoka osatzeko, aurtengoan liburu aurkezpenak, tailerrak, bisita gidatuak eta kontzertuak izan dira.