Zestoako Arteaga auzoan lehen aldiz auzoko festa eguna ospatu zuten atzo, eta herritarrek erantzun ezin hobea eman zioten auzotarrek egun hori antolatzeko hartutako lanari, jendetza bildu baitzen goizean goizetik hasita egin zituzten jarduera guztietan.
09:30ean hasi zuten eguna, Ertxina mendira igoerarekin. Ondoren, 10:30ean, Ertxinara erlojupeko proba egingo zuten hemezortzi bat lagunek, eta ordurako han ziren goizean tontorrera igotako lagunak. Eguerdian, berriz, Lagunartean deitu zuten ekitaldia gauzatu zuten auzoan bertan. Besteak beste, auzoaren izenaren eta haren bilakaeraren gaineko azalpenak eman zituzten, eta ondoren, auzoko zuhaitza neurtu eta auzoko haur jaioberriei ongietorria egin zieten. Halaber, taldeko argazkia ateratzeko ere baliatu zuten hitzordua.
Behin ekitaldi hori bukatuta, auzo bazkaria egin zten 170 bat lagunek. Sabelak bete ostean, berriz, umeentzako jolasak, auzo poteoa eta abar egin zituzten, eta gauean izango zuen segida festak. Izan ere, 21:30ean hasita, Arrixku taldearen emanaldia izango zen, eta gero erromeria Ane eta Amets musikariekin.