Eusko Jaurlaritzaren Osasun sailak eta Gipuzkoako Farmazialarien Elkargo Ofizialak (GFEO) etxez etxeko laguntza zerbitzuaren eta Gizarte Zerbitzuen erabiltzaileen artean sendagaien erabilera hobetzeko martxan duten programarekin bat egin du Zestoak. Egitasmo horrekin, udaleko Gizarte Zerbitzuek aukeratutako erabiltzaileek, hala nahi badute, pertsonalizatutako dosifikazioaren bidez arreta eta jarraipena jasotzen dute dagokien farmazian.
Mikel Arregi alkateak, Iñaki Betolaza Eusko Jaurlaritzaren Farmazia zuzendariak eta Miguel Angel Gastelurrutia GFEOren presidenteak gaur goizean sinatu dute lankidetza hitzarmena. Ekitaldian izan da, halaber, Xabier Astiz, Zestoako farmazia bakarreko botikaria.
Agerraldian nabarmendu dute Zestoa dela etxez etxeko zerbitzuen zein Gizarte Zerbitzuen erabiltzaileei botiken erabilera eta kudeaketa errazteko programari atxiki zaion Gipuzkoako 50. udalerria. Urola Kosta eskualdean programa horretan sartu den zazpigarren udalerria ere bada Zestoa; Azkoitia, Azpeitia, Getaria, Orio, Zarautz eta Zumaia zerrenda horretan zeuden lehendik, eta GFEOren presidenteak gaur aurreratu duenez, Aia ere aurki batuko zaio programari.
Koordinazioa, "funtsezkoa"
Zestoan adinekoen eta babes berezia behar dutenen zaintzarako dituzten egitasmoen barruan kokatu du Arregik gaur sinatu duten hitzarmena, eta erakunde arteko koordinazioaren garrantzia aipatu du: "Herrian hainbat proiektu ditugu martxan egoera ahulean dauden pertsonen zaintzan lan egiteko, eta, ildo horretan, erakundeen arteko koordinazioa funtsezkoa da pertsonen osasunarekin eta ongizatearekin lotutako zerbitzuak hobetzeko eta egokitzeko".
Astizen aburuz ere "oso positiboa" da botiken erabilera hobetzera zuzendutako programa. ""Farmazia komunitarioan askotan ikusten dugu adineko pertsonak ez direla beren botikak behar bezala hartzen ari: nola hartu behar duten behar bezala ulertu ez dutelako, sendagaien izenak nahasten dituztelako, ahaztu egiten zaielako... Ondorioz, pertsona horiek ez dute behar bezalako tratamendua jasotzen". Programak "paziente bakoitzaren osasuna hobetzen" lagunduko duenez, "zestoarren osasunean eragin positiboa" izango du, farmazialariaren ustez.
Funtzionamendua
Etxez etxeko zerbitzuaren zein Gizarte Zerbitzuen erabiltzaileei zuzendutako programa horrek zerbitzua nori eta nola eman zehazteko jarraibide batzuk ditu, herri guztietan modu berean aplikatzeko.
Horrela, udaleko Gizarte Zerbitzuetako arduradunek programan parte hartuko duten pertsonak aukeratzen dituzte. Pertsona horiek, programan sartu aurretik, baimena eman behar dute. Ondoren, erabiltzaileak farmazia aukeratzen du eta elkarrizketa bat egiten zaio; Zestoaren kasuan, farmazia bakarra dagoenez, hara bideratuko dituzte erabiltzaileak. Aipatutako elkarrizketan oinarrituta, erabiltzailearen fitxa osatuko dute farmazianf, hartzen duen medikazioari eta osasun arazoei buruzko informazioarekin. Ondoren, hamabostean behin edo astean behin, farmazialariak dosifikazio pertsonalizatuetan (DSP) banatuta prestatuko eta emango dizkio botikak erabiltzaileari. Pazienteak eguneko une bakoitzean hartu behar dituen pilulak jartzen dituzte farmazian bakoitzaren DSPan, dosia behar bezala hartzeko behar den informazioarekin batera.