Tres Mares enpresak kudeatzen duen Zestoako Bainuetxeko langileek bizi duten prekarietate egoera salatu du ELAk. Sindikatuak azaldu duenez, 2008tik %30,9ko erosahalmen galera pilatu dute beharginek eta maila batzuetako langileen soldatak lanbide arteko gutxieneko soldataren parekoak dira kasi. Langileek kontrolik gabeko lanaldi irregularrak, lan karga handiak, bajen ondorioz bete gabeko ordezkapenak eta abar pairatzen dituztela ere jakinarazi du ELAk. jakinarazi du enpresaren egutegien aurkako salaketak aurkeztu dituela Lan Ikuskaritzan.
Enpresarekin egindako negoziaketa saiakera guztiek "huts" egin dutela ere azaldu du bainuetxean langileen ordezkaritza guztia –hiru ordezkari ditu– daukan sindikatuak. Enpresari eskatu dio Gipuzkoako Ostatuen hitzarmena aplikatzeko, modu horretan lan baldintzak nabarmen hobetuko direlako. "Maila bakoitzeko beharginek 400-500 euroko soldata igoera izango luke hilean –6.000-7.000 eurokoa urtean–, hamazazpi orduko lanaldi murrizketa, 31 ordukoa pisuetako zerbitzarien kasuan... Gainera, Gipuzkoako hitzarmen horrek beste lan baldintza batzuk ere hobetzen ditu: plusak, lizentziak, antzinatasuna, gaueko lanaren aitorpena...", adirazi du sindikatuak ohar bidez.
Prekarietatea nagusi
Hain zuzen ere, hitzarmen hori aplikatzeari 2013an utzi zion enpresak ELAren arabera, eta langileei soldata %25 murriztu zien. Orduko hartan grebara deitu zituen beharginak ELAk, eta orain, hamabi urtera, prekarietateak "nagusi" izaten jarraitzen duela salatu du.
Relais Termal taldeko enpresa da Tres Mares, eta Zestoako Bainuetxea 2003tik kudeatzen du. Gaur egun, 50 lagunek egiten dute lan bainuetxean; horietatik %82 emakumeak dira eta %32 migranteak. Bainuetxea urtean hamar hilabetez egoten da zabalik, martxotik abendura bitartean; gainerako hilabeteetan itxi egiten dute.