Zestoak ere badu indarkeria matxistari aurre egiteko bere protokoloa. Urtebete pasako lanketa eta gero, gaur sinatu dute dokumentua udaletxean. Hain zuzen ere, indarkeria matxistaren biktima diren emakumeei arreta emateko erakundeen arteko koordinazio eta arretarako protokoloa da gaur sinatu dutena.
Sei erakundek egin dute bat protokoloarekin, eta haietako ordezkari banaren sinadura jaso dute protokoloan: Mikel Arregi alkatearena, Zestoako Udalaren izenean; Javier Bravo hiritarren babeserako arloko buruarena, Urola Kostako ertzainetxearen izenean; Jose Agustin Agirre gerentearena, Osakidetzaren Donostialdeko OSIaren izenean; Amaia Manterolarena, Zestoako Herri Eskolaren zuzendaritzaren izenean; Amaia Sarriegirena, Arroako Eskolaren zuzendaritzaren izenean; eta Oroitz Manterolarena, Aizarnazako Eskolaren zuzendaritzaren izenean. Gaurko sinadura ekitaldian parte hartu dute, halaber, protokoloaren beteraztean eta jarraipenean zerikusia izango duten zenbait erakunde eta eragiletako ordezkariek ere. Han izan dira Beatriz Zubia, udaleko Gizarte Zerbitzuen batzordeburua; Zestoako osasun zentroko Arantxa Garcia medikua eta Ainitze Gurrutxaga erizaina; Cristina Gonzalez, Urola Kostako indarkeria matxista kasuetako ertzain arduraduna; Anabela Odriozola eta Naroa Otaegi udal gizarte langileak; eta Andrea Salan udaltzaina.
Konpromisoak eta jarraipena
Udalak azaldu duenez, duela urtebete pasa abiatu zuten protokoloa osatu eta sinatu aurreko prozedura. Sortzen elkartearekin lankidetzan egin dute lanketa hori. "Besteak beste, eragile ezberdinekin, udal arduradunekin eta langileekin elkarrizketak eta formazio saioak egin dira pasa den urtebete honetan, eta emaitza gaur sinatu den protokoloa izan da".
Zortzi konpromiso edo erabaki jaso dituzte protokoloan. Formazioa, esku hartzea, prebentzioa eta erakundeen arteko koordinazioa daude guztien funtsean; oinarrizko Gizarte Zerbitzuek, Berdintasun zerbitzuak, osasun zentroak, herriko ikastetxe publikoak eta Azkoitiko ertzainetxeak osatuko duten lan mahai iraunkorra arduratuko da prozeduren jarraipenaz eta eguneratzeaz.