Euskal literaturazaleen 111 Akademiak itxi du 2024ko sariak erabakitzeko lehen bozketa txanda, eta bost literatura obra igaro dira hurrengo fasera: Joxean Agirre Zarautzen bizi den idazle azpeitiarraren Gizon barregarriak eta Uxue Alberdi Getariako bizilagunaren Hetero nahiz Miren Amurizaren Pleibak, Unai Elorriagaren Francesco Pasqualeren bosgarren arima eta Beñat Sarasolaren Coca-Cola bat zurekin.
Bost obra hautatu dituzte hurrengo faserako, hautagai izan diren euskal literatura obretako inork ez dituelako bildu akademiakideen bozen %40 edo gehiago. Horrenbestez, bigarren bozketa txanda martxan da dagoeneko, eta 218 akademiakideek apirilaren 27ra arteko epea izango dute boza emateko; bost obra horietakoren baten aldeko boza edo boz zuria eman ahal izango dute. Obretako inork ez baldin baditu botoen %40 eskuratzen, hirugarren bozketa txanda gauzatuko dute gehien bozkatutako bi obrarekin.
111 Akademiak aurreikusitakoaren arabera, maiatzaren hondarrean jakinaraziko dute zer obrarentzat den 2024ko Akademia Saria. Sari banaketa ekitaldia, berriz, ekainaren 5ean egingo dute.
Akademia kinkan
111 Akademiak ohar bidez adierazi duenez, elkartearen etorkizuna kinka larrian dago: "28 urteko ibilbidearen ostean, zailtasun handiak dauzka 111 Akademiak aurrera jotzeko". Hain zuzen ere, hemezortzi urtez akademiako teknikari izan denak postua utzi zuela ere jakinarazi dute, eta haren ordezkoa kontratatzeko "zailtasunak" dituztela esan dute. "Hori gutxi balitz, finantzaketa arazo berriak dauzka bere lan egitaraua gauzatzeko", gaineratu dute.
Jon Unanue akademiaburuak nabarmendu duenez, 28 urteotan ez dute lortu erakundeen "behar besteko babesik". Zortzi diru laguntza deialditara aurkeztu direla eta horietako birekin aurten arazoak izan ditzaketela esan dietela ere jakinarazi du. "Ezinezkoa da horrela lan egitea, ezinezkoa 28 urtez eutsi diogun ahalegin handi horri jarraipena ematea".
111 Akademiak aurrera egingo al duen erabakiko dute 2024ko saria banatu ostean. Beraz, uda aurretik hartuko du erabakia Manuel Larramendi kultur bazkunak.