Azken lau urteetan sortu dituen koadroen bilduma zabalduko du gaur arratsaldean Iñaki Oreja artista zumaiarrak Alondegiko Oxford aretoan. Abstrakziotik abiatutako lanak izango dira ikusgai egunotan Zumaiako erakusketa aretoan. Ehundura eta koloreen sinfonia jarri dio izena erakusketari, eta justu hori eskaintzen dute bilduma horretarako aukeratutako 32 koadroek.
Izan ere, koloreen dantzak mugitzen du Oreja artea sortzera. Koloreak dira haren lanen osagai nagusia, eta era guztietako koloreak erabiltzen dituela dio artista zumaiarrak. Biziak izan daitezke batzuk, geldoagoak besteak, baina mugimenduan daude, testura eta uhinak sortuz. "Mihisean lanean hasi aurretik pentsatu egiten dut zer kolore erabiliko ditudan", adierazi du artistak. Horien gainean, beti ere koloreak erabiliz, elementu figuratiboak kokatzen joaten da, abstrakzioa landuz. "Artista batzuek figurak egiten dituzte. Niri hori ez zait interesatzen; arte abstraktua da gogoko dudana. Gero, norberak erabakiko du zer ikusten duen. Azkenean, arte abstraktua subjektiboa da".
Beste margo mota batzuk erabili baditu ere, akrilikoarekin egiten du lan Orejak. "Olioak denbora asko behar du lehortzeko. Akrilikoa, berriz, azkarrago lehortzen da", dio. Badu berezitasun bat haren lana egiteko erak: ez du brotxarik edo pintzelik erabiltzen. "Espatula erabiltzen dut, bai oinarria margotzeko, baita koloreak sartzeko ere. Mugimenduak eta ehundurak ere haren bidez lortzen ditut".
Azken urteetako lanketa
Betidanik izan du Orejak pinturarako zaletasuna. Koadroak sortzearena, ordea, azken urteetako kontua da. "2019an Ander Hormazurik Forondan ematen duen tailerrean apuntatu nintzen. Lehen hilabeteetan marrazkiak egiten aritu ginen, baina nik berehala hasi nahi nuen koloreekin jokatzen", gogoratu du. Urtebete geroago, arte estudioa zabaldu zuten Garbiñe Arrieta artista zumaiarrak eta Orejak Sanjuaniturrian. Bi artistek erakusketa kolektiboa egin zuten Oxforden, 2021ean. Bi urte geroago, Orejak esperientzia errepikatu zuen areto berean; orduan, Juan Carlos Rodriguezekin. Gaur zabalduko duena da bere lehen bakarkako erakusketa.
Bere jaioterriko mostraz gain, proiektu gehiago ere baditu esku artean Orejak. Martxoan, esaterako, Luxenburgon egindako arte garaikideko 8. azokan bi koadro erakutsi zituen, eta behin Oxfordekoa amaitzean, Donostian erakutsiko du bere obra, J70 Decoracion galerian, apirilaren 25etik ekainaren 25era bitartean. "Bakarkako erakusketa izango da, eta hara hamalau lan eramango ditut. Ez dut bat bera ere errepikatuko", dio.
Zumaiako erakusketa apirilaren 22ra arte bisitatu ahal izango da Oxforden; egunero, 18:00etatik 20:00etara. Asteburu eta jaiegunetan eguerdietan ere zabalik izango da, 12:30etik 14:00etara.