Euskaraz jolas egiteko, Lapetan sortu dute Gukak eta Zumaiako Udalak elkarlanean, galdera-erantzunen online jokoa. Gaur goizean eman dituzte lehiaketaren nondik norakoak, Itzurun hondartzan egindako aurkezpenean. Gorka Zabaleta UKTko zuzendariak, Aitor Manterola Euskara zinegotziak, Felix Aizpurua UKTko komertzialak eta Josune Herrarte Euskara teknikariak parte hartu dute ekitaldian.
Zumaiarekin eta Euskal Herriarekin lotutako zenbait galdera erantzun beharko dituzte parte hartzaileek, zumaiar peto-petoak al diren erakusteko. Euskara, kultura, erlijioa, kirola, zientzia, ingurumena, politika, festak, geografia, historia, ekonomia, artea eta gizartea izango dira galdera horien artean aurkitu ahal izango diren gaietako batzuk, hain zuzen. Izan ere, jolasa martxan jarri izanaren helburuetako batzuk dira euskara bultzatzea eta herri izaeraren transmisioan laguntzea.
Maiatzeko astelehenetan
Maiatzaren 5ean hasi, eta 27ra artean izango da martxan Lapetan, astelehenero. Parte hartzaile bakoitzak 10:00etatik 22:00ak artean hamar galdera erantzun beharko ditu, eta asteroko galdera-erantzunen sailkapenaren batura asteartetan argitaratuko da, eguerdietan. Sari potoloak iragarri dituzte: irabazleak Aita Mari jatetxean lau lagunentzako jatordua eskuratuko du, eta Begi Bistan enpresaren eskutik itsas bidaia bat ere bai. Parte hartzaile guztien artean, gainera, bi lagunentzako bi jatordu zozkatuko dira Txopa tabernan.
Lehiaketan parte hartzeko, ez da aurrez izenik eman beharko, baina ezinbestekoa izango da zumaiaguka.eus atarian logeatzea, erabiltzaile datuak sartuta. Erabiltzaileak ez diren lagunek, momentuan datuak sartu eta erabiltzailea sortu beharko dute galderetara sarbidea izateko. Ezinbesteko baldintza izango da 18 urteak beteak izatea.
Lapeta joatea eta euskara, "geure-geureak"
Udalaren izenean Manterolak hartu du hitza, eta esan du "poz berezia" sortu diola udalari Lapetan jolasaren oinarrian dagoenak, euskara gaur egungo olatu teknologikora batzen lagundu dezakeelakoan. Urolako Komunikazio Taldea euskara bultzatzeko, sustatzeko eta zabaltzeko egiten ari den lana aipatzeko baliatu du hitzartzea udal ordezkariak: "Bizi-bizi dagoen euskalgintzako eragile bat da Guka hedabidea, eta herriko erakunde eta instituziook bat egin behar dugu horrelako ekimenekin".
Zumaiarrak Lapetan jokoan jolastera animatu ditu Manterolak. "Aukera paregabea" izateaz gain, "azkar egin beharrekoa" dela iruditzen zaio: "Nork bermatzen du euskalgintzako ekimen bat gaur egun atzerriko eta bertako indarrek auzipetuko ez dutenik?". Haren hitzetan, baliteke "euskararen aurkako indar horietako batek" helegiteren bat jartzea epaitegiren batean, epaile batek behartu dezan horrelako jolasak elebitan izan behar dutela. Eta balizko epai horren atzetik, Eusko Jaurlaritzak euskarazko komunikazioko diru laguntzen oinarrietan atzerapausoa egitea ere bai. "Gertatu egin da, eta gertatzen ari da", gaineratu du Euskara zinegotziak.
Horregatik ere zumaiarrak Lapetan jolastera animatu ditu Manterolak, "geure-geureak direlako lapeta joatea eta euskara".
