Espainiako Gobernuarekin egindako eskumen aldaketari esker, atzotik, apirilak 1, Eusko Jaurlaritzak du itsasertza kudeatzeko ardura. 246 kilometro dira, ur eta kosta, Cobaron lurmuturretik hasi Bizkaiko mendebaldeko mugan, eta Bidasoa ibaiak Gipuzkoa eta Lapurdi artean duen banalerroraino. Tartean daude, noski, Zumaiako, Getariako, Zarauzko eta Orioko itsasertzak.
Besteak beste, Eusko Jaurlaritzak honakoak kudeatuko ditu: intentsitate, arrisku edo errentagarritasun jarduera bereziak, hala nola dragatzeak eta agregakinak ateratzeak; instalazio desmuntagarriei dagokien okupazioaren kontrola, hala nola kafetegi, izozki edo ur postu eta tabernak; itsasorako igarobide eta sarbide-zortasuneko zonak; eta hondartza denboraldirako baimenak.
Hala, hamalau lanpostu eskualdatuko dituzte Euskal Autonomia Erkidegora, eta horiek Eusko Jaurlaritzaren bulegoetan ariko dira lanean.
Amaia Barredo Elikadura, Landa Garapen, Nekazaritza eta Arrantza sailburuak prentsaurrekoa eman zuen eskumen berriaren harira, eta azaldu zuen ekonomia urdina bultzatuko dutela: "Euskal itsasertzaren garapenak industria jasangarri berriak sortzea ahalbidetu behar du, Europako Batasunak zehaztutako ildotik, ekonomia urdin berria bultzatuz eta Euskadi globalaren garapena babestuz".